​Abu Ali ibn Sino nomidagi Buxoro davlat tibbiyot institutida ta’lim va ilm-fan sohasida samarali faoliyat yuritib, qator yutuqlarga erishgan professor-o‘qituvchilarni taqdirlash marosimi bo‘lib o‘tdi.
​Tadbirda institut rektori Shuhrat Teshayev ta’lim sohasidagi ko‘p yillik samarali mehnati, kasbiy mahorati va erishgan yutuqlari bilan alohida e’tirof etilgan bir guruh professor-o‘qituvchilarga vazir buyrug‘i asosida berilgan “Oliy ta’lim a’lochisi” ko‘krak nishonlarini tantanali ravishda topshirdi.
​Taqdirlash marosimida ustozlarning ta’lim sifatini oshirish, malakali tibbiyot kadrlarini tayyorlash, ilmiy izlanishlarni rivojlantirish hamda institut nufuzini yuksaltirish yo‘lidagi xizmatlari alohida e’tirof etildi.

​Kelgusida institutda ta’lim va ilm-fan sifatini yanada oshirish, xalqaro hamkorlikni kengaytirish, ilmiy salohiyatni mustahkamlash hamda yangi yutuqlarga erishishga qaratilgan ustuvor vazifalarni amalga oshirish belgilandi.
​Bunday e’tirof ustozlar uchun yuksak rag‘bat, yosh avlodni bilimli va malakali mutaxassislar etib tarbiyalash yo‘lidagi mas’uliyatni yanada oshiruvchi muhim omildir.

​Abu Ali Ibn Sino nomidagi Buxoro davlat tibbiyot instituti axborot xizmati