​Buxoro davlat tibbiyot institutining to‘rt nafar vakili Germaniyaning Lyubek shahridagi Shlezvig-Golshteyn universitet klinikasining (Universitätsklinikum Schleswig-Holstein) jarrohlik bo‘limida xalqaro amaliy stajirovka o‘tamoqda.
​2026-yil 17-oktabrdan 8-noyabrga qadar davom etadigan stajirovkada ikki nafar shifokor — Feruza Sayfulloyevna Nabiyeva va Go‘zal Ubaydullayevna Nurova, shuningdek, institutning 4-bosqich talabasi Sharofat Hakimjonova va 5-bosqich talabasi Amirbek Usmonov ishtirok etmoqda.
​Amaliyot davomida ishtirokchilar jarrohlik bo‘limining ish jarayonlari, operatsiyalarni rejalashtirish, zamonaviy jarrohlik usullari, laparoskopik va robot-assistentli operatsiyalar, shuningdek, tibbiyot xodimlari o‘rtasidagi jamoaviy hamkorlik tajribasini o‘rganmoqda.

​Xususan, 19–20-oktabr kunlari ular ochiq va laparoskopik jarrohlik amaliyotlarini kuzatish bilan birga, da Vinci robotlashtirilgan jarrohlik tizimi yordamida buyrakdagi o‘smani olib tashlash operatsiyasi jarayoni bilan ham yaqindan tanishdilar.
​Xalqaro stajirovka ishtirokchilarning kasbiy bilim va amaliy ko‘nikmalarini oshirish, Germaniyaning ilg‘or tibbiy tajribasini o‘rganish hamda uni mahalliy tibbiyot amaliyotiga tatbiq etish imkoniyatlarini kengaytirishga xizmat qiladi.
​Buxoro davlat tibbiyot institutining xalqaro hamkorlikni rivojlantirish, zamonaviy tibbiy texnologiyalarni o‘zlashtirish va tibbiyot ta’limi sifatini oshirish borasidagi sa’y-harakatlari izchil davom etmoqda.

​Abu Ali Ibn Sino nomidagi Buxoro davlat tibbiyot instituti axborot xizmati