Mazkur bayram 1925 yil Jenevada bolalar farovonligiga bag‘ishlangan Butunjahon konferensiyasida ta’sis etilgan bo‘lsa, oradan 25 yil o‘tib, 1950 yildan bayram sifatida nishonlab kelinadi.

Mamlakatimizda ham ushbu bayram har yili dillarda quvonch ila nishonlanadi. Bolalar o‘z tabassumlari orqali insonlar qalbida hayotga, yashashga bo‘lgan qiziqishni uyg‘otadilar. Ko‘zlarida ezgulik va mehr qalqib turgan bolajon musaffo osmonda erkin parvoz etayotgan qaldirg‘och misoli. Hayotimiz davomchilari, kelajagimiz egalari bo‘lgan bolalarni asrab-avaylash, har tomonlama barkamol qilib voyaga yetkazish har bir davlat, har bir oila, har bir ota-onaning muqaddas burchidir.

Bugun Abu Ali ibn Sino nomidagi Buxoro davlat tibbiyot instituti hovlisi ishchi xodimlar, professor o’qituvchilarning farzandu nevarasi bilan shodu xurram, quvonchu kulgularga to‘ldi.

Tabrik so‘ziga chiqqan institut prorektori Zubayda Baxranova bolajonlarni bu bayram bilan muborakbod etib, ularga salomatlik va baxtli bolalik tiladi.

Bayram dasturida turli institut sport majmuasida sport musobaqalari, kuy qo‘shiqlar bolajonlarga olam olam zavq ulashdi. Shuningdek, barcha bayram ishtirokchilariga institut rahbariyati tomonidan esdalik sovg‘alar ulashildi.