Yaqinda Indoneziyaning “UI Green Metric World University Ranking” xalqaro reyting agentligi tomonidan butun dunyo oliy ta’lim muassasalari bo‘yicha joriy yil reyting natijalari e’lon qilindi.

Abu Ali ibn Sino nomidagi Buxoro davlat tibbiyot instituti  “UI Green Metric World University Ranking” nufuzli reytingida TOP-1000 ta oliy ta’lim muassasalari qatorida barqaror rivojlanayotgan oliygoh sifatida e’tirof etildi va dunyo universitetlari ichida 911-o‘rinni egalladi. Bu mamlakatimizdagi tibbiyot universitetlari ichida 1-o‘rin hisoblanadi.

Shu bilan birga “eng faol institut” nominatsiyada ham BuxDTI munosib e’tirof etildi. 

Bunda asosan institutning sifatli ta’lim tizimi va infratuzilma, yashil energiyadan foydalanish darajasi, shuningdek, iqlim o‘zgarishi, suv muammosi, transport sohalari, fan va tadqiqot yo‘nalishlaridagi faoliyati o‘rganilib, xalqaro reyting agentligi tomonidan yuqori baholangan.

Ma’lumot uchun, UI Green Metric World University Ranking – 2010 yilda “Universitas Indonesia” tomonidan tashkil etilgan yashil kampus va ekologik barqarorlik reytingidir. Mazkur tanlov “Universitas Indonesia” tomonidan o‘tkaziladigan jahon darajasidagi oliy o‘quv yurtlari reytingi bo‘lib, 6 mezon bo‘yicha 39 ko‘rsatkich orqali universitetlarning ekologik majburiyatlari va tashabbuslari natijalarini shaffof aniqlashga qaratilgan. Demak, UI Green Metric World University Ranking – “yashil” universitetlarning global reytingi hisoblanadi.

Aytish joizki, BuxDTI  bu muvaffaqiyati mohiyatida Prezidentimiz tashabbuskorligida mamlakatimizda jadal tus olgan “Yashil makon” umummilliy loyihasi ijrosi va musaffo dunyo taqdiriga ziyo ahlining dahldorlik mas’uliyati mujassamdir. Eslatib o‘tamiz, institut mamlakat oliy o‘quv yurtlari milliy reytinggida 4-o‘rinni egallagan edi.