Abu Ali ibn Sino nomidagi Buxoro davlat tibbiyot institutida mamlakatimizning turli viloyatlarida faoliyat ko’rsatadigan badiiy gimnastika klublari tomonidan 30 iyun – Yoshlar kuni munosabati bilan kuni bayrami munosabati bilan badiiy gimnastika bo’yicha 2019-2009 yillarda tug’ilgan qizlar o’rtasida “Super Star” nomli Respublika ochiq turniri o’tkazildi.

O’zbekiston gimnastika federatsiyasi, Buxoro davlat tibbiyot instituti va boshqa tashkilotlar bilan hamkorlikda o’tkazilgan mazkur ochiq turnirda Buxoro, Navoi, Nukus, Toshkent, Samarqand, Jizzax, Sirdaryo viloyatidan 250 nafardan ortiq yosh sportchi-qizaloqlar ishtirok etishdi.

Musobaqada gimnastikachilar bulava, arg’amchi, halqa, to’p, tasma kabi buyumlarda bajariladigan nozik va nafis mashqlarni o’zlari tanlagan musiqa sadolari uyg’unligida namoyish etishdi.

Murosasiz o’tgan bellashuvlarning yakuniy natijasiga ko’ra, mezbonlar Buxoro viloyati jamoasi faxrli birinchi o’rinni qo’lga kiritdi. Ikkinchi o’rinni Toshkent shahri jamoasi egallagan bo’lsa, uchinchi o’rin Samarqand viloyati qizlariga nasib etdi. G’olib va sovrindorlar tashkilotchilar tomonidan diplom, medal va esdalik sovg’alari bilan mukofotlanishdi.

Aytish joiz, musobaqada ishtirok etgan jajji qizaloqlar o’z imkoniyatlarini sinovdan o’tkazishlari bilan birga o’zlari uchun mahorat saboqlari ham olish imkoniyatiga ega bo’lishdi.