Buxoro xalqaro aeroportida Fransiyaning Parij shahrida bo‘lib o‘tgan XXXIII Yozgi Olimpiada o‘yinlarida ishtirok etib, boks bo‘yicha chempionlikni qo‘lga kiritgan Abdumalik Xalakov tantanali ravishda kutib olindi.

Shu munosabat bilan bu yerda viloyat hokimligi vakillari, sektorlar rahbarlari, murabbiylar, sportchilar hamda keng jamoatchilik vakillari ishtirokida tantanali tadbir o‘tkazildi.

Tantanada viloyat hokimi Botir Zaripov so‘zga chiqib, Olimpiada chempionini hamda ishtirokchilarni samimiy tabrikladi.

Shuningdek, viloyat rahbari yurtimiz bayrog‘ini jahon uzra baland ko‘taradigan mana shunday matonatli va vatanparvar farzandni tarbiyalaganliklari uchun uning ota-onasiga alohida minnatdorlik bildirdi hamda chempion va uning murabbiyiga zarbof to‘n kiydirdi.

Chempion, uning ota-onasi so‘zga chiqib, Prezidentimizning sportga qaratayotgan e’tibori, Vatanimiz shuhratini nufuzli musobaqalarda keng tarannum etish uchun sportchilarga yaratayotgan sharoitlar uchun o‘z minnatdorliklarini bildirdi.

Tantanali tadbir ishtirokchilari Buxoroning mard o‘g‘loni bilan esdalik uchun suratlarga tushdi va gullar tuhfa qilishdi.

Tantanali tadbirdan so‘ng Abdumalik Xalakov ishtirokidagi kortej Buxoro shahar markazi tomon yo‘l olishdi. Shahrimiz ko‘chalarida ularni minglab sport muxlislari va vatandoshlarimiz gullar, olqishlar bilan kutib oldilar.