Abu Ali ibn Sino nomidagi Buxoro davlat tibbiyot institutiga Xitoyning Shinjon Tibbiyot Universiteti vakillari tashrif buyurdi.
​Tashrif doirasida akademik Demin Han, professor Jiangyu Zhao va Bilaliding Yibulayin institut rektori Shuhrat Teshayev hamda xalqaro hamkorlik bo‘yicha prorektor Aziz Niyazov tomonidan kutib olindi.

​​Xitoylik mehmonlar institutning moddiy-texnik bazasi va ta’lim jarayoni uchun yaratilgan sharoitlar bilan yaqindan tanishdilar. Jumladan, institut muzeyi, Axborot-resurs markazi, Xalq tabobati laboratoriyasi, Simulyatsiya markazi hamda institut klinikasi faoliyati ko‘zdan kechirildi.
Tashrif davomida mehmonlarga institutda amalga oshirilayotgan ta’limiy va ilmiy-tadqiqot ishlari, zamonaviy tibbiy texnologiyalardan foydalanish imkoniyatlari hamda klinik amaliyot yo‘nalishlari haqida ma’lumot berildi.
​Uchrashuvda ikki tomonlama hamkorlik imkoniyatlarini kengaytirish, ta’lim va ilmiy-tadqiqot sohalarida tajriba almashish, shuningdek, istiqbolli qo‘shma loyihalarni amalga oshirish masalalari muhokama qilindi.
​Tomonlar kelgusida muhim va istiqbolli loyihalar ustida birgalikda ishlash hamda o‘zaro hamkorlik aloqalarini yanada mustahkamlashga kelishib oldilar.

​Abu Ali Ibn Sino nomidagi Buxoro davlat tibbiyot instituti axborot xizmati