Malik Amonov — immunologiya, mikrobiologiya va jamoat salomatligi sohalarini o‘zida mujassam etgan taniqli olim hamda pedagog bo‘lib, hozirda Buxoro davlat tibbiyot institutida ilmiy va innovatsion ishlari bo‘yicha prorektor lavozimida faoliyat yuritmoqda. U o‘zining xalqaro tajribasi, boy ilmiy merosi va pedagogik faoliyati bilan institutda ilm-fanni rivojlantirish, ta’lim sifatini oshirish, ilmiy tadqiqotlar salohiyatini kuchaytirish borasida muhim hissa qo‘shib kelmoqda.

Uning ilmiy faoliyati immunologiya, vaksina ishlab chiqish va antibiotiklarga chidamlilik masalalariga qaratilgan. Xususan, Streptococcus pneumoniae bakteriyasiga qarshi jonli zaiflashtirilgan vaksinalar, Vibrio cholerae ga qarshi DNK-vaksina, hamda Acinetobacter baumannii bakteriyasining genetik chidamlilik mexanizmlarini o‘rganishga bag‘ishlangan loyihalar ustida ishlagan. Bu izlanishlar global sog‘liqni saqlash sohasida dolzarb muammolarga javob bo‘lib xizmat qilmoqda.

U 10 yildan ortiq vaqt davomida Malayziya, Yaponiya, va O‘zbekistonning yetakchi oliy ta’lim muassasalarida ilmiy-pedagogik faoliyat olib borgan. Sultan Zainal Abidin universitetida o‘qituvchi, ilmiy xodim va postdoktoral tadqiqotchi sifatida faoliyat yuritib, o‘ndan ortiq xalqaro ilmiy jurnallarda maqolalar chop ettirgan.

Bugungi kunda u ilmiy izlanuvchilar, magistr va PhD talabalarning ilmiy ishlanmalariga rahbarlik qilmoqda. Uning yetakchiligida bir nechta magistrlik va doktorlik dissertatsiyalari amalga oshirilgan. Ayniqsa, genetik o‘zgartirishlar asosida vaksina ishlab chiqish, NEToz (neutrofil ekstrasellyulyar tuzilmalar) va bakterial infeksiyalar bo‘yicha olib borilayotgan tadqiqotlar diqqatga sazovor.

Malik Amonov o‘zining mehnatsevarligi, yangilikka intilishi, tashabbuskorligi, mustaqil fikrlashi va ilmga bo‘lgan fidoyiligi bilan institut jamoasi va xalqaro ilmiy doiralarda e’tirof etilgan.

U Malayziya hukumati, Yaponiya MEXT va O‘zbekiston hukumati grantlari sohibi bo‘lib, ilm-fanga qo‘shgan hissasi uchun bir nechta mukofot va rag‘batlantirishlarga sazovor bo‘lgan.

• 1999-2006 yy. – Buxoro davlat tibbiyot instituti talabasi
• 2007-2009 yy. – Toshkent Pediatriya tibbiyot instituti magistranti
• 2008-2010 yy. – O’zbekiston vrachlar assotsiatsiyasida bosh mutaxassis
• 2010-2011 yy. – Toshkent shahar 1-son kasalxonasi shifokori
• 2011-2012 yy. – Samarqand davlat tibbiyot instituti “Jamoat tibbiyoti” kafedrasi assistenti
• 2012-2013 yy. – Nagoya Universiteti (Yaponiya), Sog’liqni saqlash administratsiyasi kafedrasi magistranti
• 2014-2019 yy. – Sulton Zainal Abidin Universitetida Ph.D. kafedrasi aspiranti
• 2020-2025 yy. – Sulton Zainal Abidin Universitetida “Patologiya va tibbiy laboratoriya” kafedrasida katta o’qituvchi